Letër për JU që ratë në altarin e lirisë..!

Të nderuar dëshmorë, këtu në Kosovë ka shumë llafe, por punë bëhet pak,…

 

Letër për JU që ratë në altarin e lirisë..!

 

· Të nderuar dëshmorë,

po ju tregoj se një pjesë e shokëve tuaj të luftës janë nëpër poste të larta, kryetarë partish, disa janë në pozitë, disa në opozitë. Kanë bërë famë, pasuri, bile disa prej tyre u kanë siguruar pasuri brezit të brezit. Disa prej tyre vozisin makina shumë luksoze dhe të shtrenjta, nuk qajnë hallet për askënd, shikojnë vetëm interesat e tyre personale. Nuk shohin më larg… Gjithashtu po ju njoftojë, se një pjesë e shokëve tuaj që luftuat bashkë kanë mbetur rrugëve të këtij vendi. Për ta nuk kujdeset askush. Familjet dhe fëmijët e tyre, përsëri po vuajnë, nuk po mund të shkollohen si duhet, nuk po mund të punësohen, janë të diskriminuarit e kësaj shoqërie. Një pjesë e shokëve që luftuan me ju, tani janë nëpër burgje, po dergjen për shkak të gjykimeve të montuara nga të huajt dhe shërbyesit vendorë.

 



Shkruan: Fehmi Ramadani * 09. 04. 2009

Dëshmorët e Ushtrisë Çlirimitare të Kosovës


 

  Kaluan dhjetë vjet, nga “çlirimi” i Kosovës, për të cilën ju ishit të parët kur kërkoi kjo tokë dhe ky popull, që t’iu dilni zot asaj në mbrojtje nga hordhitë serbo-çetnike, të cilët dogjën e përvëluan çdo gjë shqiptare. Në histori nuk mbahej mend, që nga pas lufta e dytë botërore, që në shekullin XX, bota të ketë parë skena të llahtarshme të vrasjeve, plaçkitjeve, dhunimeve, dëbimeve dhe gjithçka që ishte ç’njerëzore bëhej ndaj këtij populli. Pushtuesit deshën të na zhbënin nga kjo tokë, vetëm pse perëndia na kishte fal ndryshe. Kjo ndodhi mu në zemër të Evropës dhe këto hordhi sllave kishin vrarë dhe masakruar rreth 15 mijë burra, pleq, gra, shtatzëna dhe fëmijë të pafajshëm vetëm pse ishin shqiptarë. Rreth një milionë banor i dëbuan nga shtëpitë dhe trojet e tyre. Këto skena marramendëse të kujtojnë filmat më të tmerrshëm që kishim parë më herët nëpër kampet e përqendrimit të Gjermanisë naziste. Kolonat me njerëz të strehuar nëpër përroska, lugina, autobusë të mbushur plotë, trena që largonin pa reshtur njerëz, padyshim të kujtonin historinë çifute të periudhës fashiste. Kampi i refugjatëve shqiptar në “Stenkovec ”, “Neproshten”, “Çegran”, “Radushë”, “Has e Krumë” të ngjanin sikur kampi i Holokaustit, Dahaut, Aushvicit dhe të tjerë. 

·  

 Mirëpo, me luftën Tuaj titanike (djemve dhe vashave më të mira të këtij kombi), luftën e UÇK-së, të NATO-së, me mbështetje të fortë të SHBA-ve, mikut më të madh të shqiptarëve dhe shteteve tjera demokratike u arrit që kjo kasaphane të ndalet ndaj këtij populli. U arrit që ky vend, pas njëqind vjet robërie të hekë qafësh një pushtues shumë barbarë, të frymojë më lirshëm dhe të ecë rrugës së vet. Deri këtu erdhëm, falë jetës dhe gjakut tuaj, por edhe falë një sakrifice të paparë të këtij populli, i cili kishte humbur shumë, si në aspektin njerëzor, por edhe material. Përkundër, dëmit kolosal që kishte bërë, armiku nuk arriti qëllimin, të realizoj projektin ogurzi ”Patkoi”, për dëbimin dhe shfarosjen e shqiptarëve nga këto troje. Sepse, JU këtë nuk e lejuat, duke dhënë jetën Tuaj, gjymtyrët Tuaja për këtë vend e për këtë popull. Çdo pëllëmbë e kësaj tokë është e ujitur me gjakun Tuaj, në çdo fshat dhe qytet është ngritur nga një simbol nderimi për JU dhe populli për çdo vit JU përkujton dhe nderon duke vënë lule mbi varret Tuaja. Nderimi i përjetshëm qoftë për Ju!

 

  Ju njoftova shkurtimisht për vuajtjet dhe sakrificën e këtij populli, për të cilën flijuat jetën Tuaj, por tani po ju njoftojë se ku ka mbërritur Kosova pas të gjithë këtyre peripecive, dhe si jeton ky popull, të themi pas “çlirimit” të tij.

·  

 Ka një vjet që ky vend ka shpallur pavarësinë e saj, kuptohet me ndihmën e botës demokratike dhe po synon të bëhet një vend demokratik si të tjerët. Mirëpo, e keqja e këtij është shtet i kushtëzuar dhe jo si të tjerët. Deri më tani këtë shtet të kushtëzuar e kanë njohur 57 vende të botës. Tani, ky vend ka një flamur dhe një himn të cilin ju nuk e njihni. Është tjetër nga ai që kishit dhënë betimin Tuaj për çlirim të vendit. Ky vend, tani ka shumë parti politike, të cilat po ndërrohen sipas kutit të interesave të tyre klanore, krahinore e më gjerë. Në këtë vend, ka katër pushtete, tri të huaja dhe një vendore. Këtu, po ndërtohet një sistem mish-mash, as kapitalist, as socialist, as komunist, pra një sistem i përzier. Deri më tani bota nuk e ka njohur një sistem të tillë. Këtu gjithçka është e kufizuar, rryma, uji, ushqimi, shërbimet shëndetësore e deri te pavarësia e saj, sepse udhëheqësit e saj e kanë aprovuar njëfarë Plani të Ahtisarit, i cili këtë vend e sheh si tokë të gjithkujt dhe të askujt. Ky vend, tanimë sundohet dhe kontrollohet nga gjithkush dhe askush. Këtu, sundon një farë UNMIK-u, EULEXI, Qeveria e Serbisë dhe një hise e ka Qeveria e Kosovës. Në këtë vend janë instaluar me dhjetëra shërbime të huaja, të cilat bëjnë punën e djallit. Pra, Kosova është shndërruar në një eksperiment të paparë deri më tani në rruzullin tokësor.

·  

  Po ju njoftojë, se populli i këtij vendi po jeton në varfëri të madhe, rreth 90 për qind e tyre janë të varfër, ndërsa rreth 15 për qind jetojnë në varfëri të skajshme. Janë mbushur rrugët e këtij vendi me lypsa, gjithë andej e gjithë këndej. Papunësia është e madhe, rreth 60 për qind e tyre janë të papunë. Këtu janë pasuruar hajdutët, pseudopatriotët, kriminelët, klosharët, shërbyesit e pushtuesit, shërbyesit e shërbimeve të huaja dhe të tjerë. Shumica e këtyre njerëzve janë të privilegjuarit e kësaj shoqërie.

·  

  Po ashtu, po ju tregoj se një pjesë e shokëve tuaj të luftës janë nëpër poste të larta, kryetarë partish, disa janë në pozitë, disa në opozitë. Kanë bërë famë, pasuri, bile disa prej tyre u kanë siguruar pasuri brezit të brezit. Disa prej tyre vozisin makina shumë luksoze dhe të shtrenjta, nuk qajnë hallet për askënd, shikojnë vetëm interesat e tyre personale. Nuk shohin më larg. Ata janë mirë, po fitojnë çdo ditë tenderë të ndryshëm, po bëjnë biznes në emër të “prosperitet dhe zhvillimit” të Kosovës. Fëmijët e tyre po shkollohen nëpër shkolla private dhe jashtë vendit, sepse ata janë të privilegjuarit e kësaj shoqërie. Këtë vend e kanë shndërruar në zona krahinore, bile edhe kanunore, po s’je i krahinës së tij nuk mund të shkollohesh, nuk mund të punësohesh. Krejt politika e këtij vendi është bërë krahinore, njëherë e sundonte Dukagjini, tani kalit i ka hipë Drenica dhe Llapi. Ky vend është bërë vendi më i pështjelluari në botë

 Tani, çfarë t’ju them, kam shumë, ndoshta nuk po ju lodhi, sepse këto fjalë po dalin nga shpirti i një të lënduari, i cili dha dy breza për idealin kombëtar, e kur lëndohet ky shpirt, atëherë dihet çfarë del nga ai.

·  

  Ju njoftojë se sunduesit e këtij vendi po thonë se është i lirë, ky vend nuk është ende i lirë, sepse rreth 30 për qind të këtij territori e mbajnë peng hordhitë çetnike. Nëpër këto vendbanime shqiptarët nuk kanë qasje, aty shteti nuk funksionin, sepse aty funksionojnë ligjet e barbarisë. Ky vend, tani për tani nuk ka siguri për qytetarët e saj edhe pse ka forca të shumta ndërkombëtare. Ky vend nuk ka ushtri, siç ishit Ju, tani e kanë formuar një Forcë të Sigurisë, e cila është një organizatë civile dhe asgjë më shumë. Ky vend ka një Polici, por këtë Polici nuk e udhëheqin vendorët, i huaji vendos, tanët nuk kanë kompetenca. Në veri të vendit shqiptarët po pësojnë vazhdimisht, sepse ajo pjesë u është lënë bandave dhe kriminelëve serb. Pakica serbe, kurrsesi të integrohet në shoqërinë kosovare, sepse nuk mund të pranojnë filozofinë e të barabartit, sepse ata janë mësuar të jenë gjithmonë sundues. Kanë marrë shumë privilegje me Pakon e Ahtisarit, trajtohen si komb në Kosovë, edhe pse përbëjnë vetëm 5 për qind të popullatës së këtushme.

·  

 Këtu, në këtë vend dhjetë pas luftës nuk ka rrymë, ujë, shërbime jo të mira shëndetësore. Këtu shkollimi bëhet vetëm për famë, e jo për cilësi, apo kreativitet të dobishëm shoqëror. Në këtë vend ekonomia është ka shkatërrohet, profiterët e luftës i kanë shitur shumicën e ndërmarrjeve shtetërore për pak para, për interesa të tyre, ndërsa shumë punëtorë kanë mbetur në rrugë. Korrupsioni, nepotizmi janë gallopante, nuk mund të punësohesh askund nëse nuk ke ndonjë lidhje, apo të korruptosh ndonjë zyrtar të lartë. Ju njoftojë se krejt Kosova është bërë një qytet-katund, ndërtohet vend e pa vend, plan e plan, janë ndërtuar objekte nëpër fusha, kodrina e gjithkund, sepse nuk ka shtet, nuk ka ligj, nuk ka kush i pengon. 

·  

  Të nderuar dëshmorë, këtu në Kosovë ka shumë llafe, por punë bëhet pak, gjithkund dhe gjithkah shohim rrahagjoksë, që i bëjnë vetes lavd, i thurin poezi, e bëjnë një mijë e një qind dredhi vetëm e vetëm të përfitojnë diçka. Të gjithë janë bërë Mic Sokola, Adem Jashara, Azem Bejta, sa që nuk e kam të qartë pse na ndihmoi bota. Nuk kam fjalë si t’i përshkruaj ata.

·  

Po ju njoftojë, se një pjesë e shokëve tuaj që luftuat bashkë kanë mbetur rrugëve të këtij vendi. Për ta nuk kujdeset askush. Familjet dhe fëmijët e tyre, përsëri po vuajnë, nuk po mund të shkollohen si duhet, nuk po mund të punësohen, janë të diskriminuarit e kësaj shoqërie. Njerëzit e ndershëm, të moralshëm, me dinjitet dhe ata të mirëfilltë kombëtar i kanë lënë nëpër greminat e shoqërisë, i kanë fut nëpër biruca. Një pjesë e shokëve që luftuan me ju, tani janë nëpër burgje, po dergjen për shkak gjykimeve të montuara nga të huajt dhe shërbyesit vendorë. Një pjesë e tyre kanë ikur kah sytë këmbët, kanë marrë rrugën e kurbetit, duke lënë familjet e tyre. Një pjesë e tyre që kishin ardhur nga perëndimi për të luftuar këtu, përsëri janë kthyer nga kanë ardhur, sepse nuk ishin të mirëpritur këtu. Vëllezërit tonë që kishin ardhur vullnetar për të luftuar nga Shqipëria, tani më nuk janë të mirëpritur, ata po shikohen me sy të dyshimtë, si rebelë, kaçak, apo hajdut. Kjo shoqëri ka pësuar transformim të madh, bashkë me të edhe deformime të mëdha. Absurdi është se tani po krijohet një identitet i ri kombëtar i quajtur kosovar. Në dokumentet tona të udhëtimit jemi nacionalitet kosovar, e jo shqiptar. Janë bërë ndryshime të mëdha në kokat tona. Tani ne kosovarët dhe ata shqiptarët jemi dy kombe të ndryshme. Ata festojnë hyrjen në NATO, ndërsa ne bëjmë sehir, sepse jemi ndryshe, po ndahemi, nuk jemi një komb. Kjo ka ndodhur hiq më larg se këtyre ditëve. Një ngjarje e tmerrshme ka ndodhur këtu në Kosovë, një fëmijë tetë vjeçar para ca ditësh e kanë ngrënë qentë endacak duke ardhur prej shkollës. Kjo ka ndodhur këtu në Kosovën e “lirë”. A kjo është liria për të cilët ju dhatë jetën tuaj. Pas këtij lajmi të tmerrshëm nuk mund ta zgjas më, jam i lënduar, nuk dua që edhe shpirtrat tuaj të shqetësohen në atë botë, bile atje e meritoni të jeni të qetë. Në këto momente fjalët janë të tepërta, nuk ka çka të flitet më. Njerëzit janë hutuar, nuk dinë nga t’ia mbajnë. Duken sikur të gjithë janë të traumatizuar, nuk dinë çka po ndodh me ta. Kjo po ndodhë këtu në këtë vend të botës, mu në zemër Ballkanit dhe të Evropës. 

·  

  Në fund, Zoti Ju mëshiroftë, Zoti Ju bekoftë dhe Ai Ju lartësoftë me xhenetin më të mirë të botës së amshueshme, sepse Ju këtë e meritoni me veprën Tuaj të shenjtë.

Lavdi të gjithë dëshmorëve dhe martirëve të rënë për lirinë e atdheut!

 

· Autori është gazetar dhe analist i pavarur.