Shkupi po falsifikon historinë

Nimfa Thu Mar 12, 2009 1:21 pm

Zëvendësministri i Punëve të Jashtme të Greqisë Miltiadhis Varviciotis ka drejtuar akuza të rënda në adresë të Shkupit zyrtar, duke e fajësuar për falsifikim të historisë dhe përvetësim të trashëgimisë së lashtë maqedonase

“Përdorimi i emrit "Maqedoni" nga vendi ynë fqinj përbën një përpjekje të qartë falsifikimi të historisë, dhe përvetësimi të trashëgimisë së lashtë maqedonase, e cila është një pjesë e pashkëputshme e kulturës greke”, ka theksuar zëvendësministri i jashtëm grek, Miltiadhis Varviciotis në një intervistë për të përditshmen shqiptare “Koha jonë” në Tiranë.
Ai ka nënvizuar se negociatat nuk kanë dhënë rezultate për shkak të kokëfortësisë së palës së Shkupit.
“Negociatat nën agjendën e ndërmjetësuesit të posaçëm të Sekretarit të Përgjithshëm të OKB-së, Metju Nimic, nuk kanë dhënë rezultate deri tani, për shkak të qëndrimit kokëfortë të qeverisë së FYROM, të retorikës së saj agresive dhe të veprimeve provokuese kundër Greqisë. Një shembull karakteristik së fundmi është ndërrimi i emrit të Korridorit Evropian Rrugor 10 që kalon nga territori i këtij vendi në "Aleksandër Maqedonasi", veprim që vë në rrezik ndërtimin e kësaj vepre me rreze rajonale veprimi, për të cilin Greqia kishte angazhuar falas financim prej 50 milionë euro”, ka theksuar diplomati i dytë grek.
Sipas tij, Greqia ka mbajtur qëndrim konstruktiv dhe dëshiron gjetjen e një zgjidhjeje reciprokisht të pranueshme, e cila do të përfshijë një emër të përbërë, në mënyrë që të bëhet dallimi i qartë nga rajoni grek i Maqedonisë, dhe cili emër do të përdoret kundrejt të gjithëve ("erga omnes").
Ai ka shtuar se në mënyrë që të sigurohet zgjidhje përfundimtare dhe e pakthyeshme e çështjes do të duhet që kjo zgjidhje të adoptohet nga Këshilli i Sigurimit i OKB-së.
“Vendet fqinje e mike si Shqipëria, mund të kontribuojnë në rregullimin në kohë të çështjes, duke përkrahur ligjin ndërkombëtar dhe duke kërkuar nga pala tjetër të tregojë frymë kompromisi në negociata dhe t'u largohet veprimeve provokuese, që rëndojnë marrëdhëniet dypalëshe dhe janë negative për marrëdheniet e fqinjësisë së mirë”, ka theksuar zëvendësministri i Punëve të Jashtme të Greqisë Miltiadhis Varviciotis. (INA) /11 Mar 2009/V.I.