HUMOR(piper)ESKA - nga Jorgo S. TELO

BOTË-BOTË, LARAMANE!



Eh, botë, botë laramane,

Plot paralele e meridiane,

a e ndien ç’përmban?



Sa ikanakë e ardhacakë

Tutje-tëhu e poshtë e lartë…

E gjora ti ç’përmban!



Ç’paske mbi vete, a e di?

Të gjitha sojet... eh, ç’turli!

S’di kë lëndon e shan…



Mbi kurmin tënd gjen përnjëheri

Të krejta ngjyrat e ylberit…

E lumja ti ç’përmban!



O botë e sertë, botë e mbarë,

Ti veç njerinë ke thesar.

Hej, lumja ti ç’përmban!



Përsëjashtmi na njohke mirë.

Por, pësëbrendshmi…sa vështirë!

Meraku të përthan…!



I ardhke diellit rreth e qark.

Rrotull vetvetes – ditë e natë.

Herë qesh dhe herë qan...



Herë e ashpër e herë e butë

Zë e peshon njerëzi nga trutë

Oj, oj e broj - aman!

RRËFEHET TOKA



Githë të mirat i kam me vete

Ujërat,

gjallesat,

blerimin.

Më zhvokshin vullkane, tërmete.

Dot nuk kuptoj

njerëzimin…

RRËFEHET QIELLI



Më ka tretur e bren një merak:

“Fronin…

ku e paske, o Zot?

Jam i pakapshëm...

i pamatë;

Veç... s’mund të bëhem Fuqiplot.

Edhe retë s’i bëj dot zap.

Bredhin…

Si dhe njerëzit

mbi tokë

RRËFEHET DETI



I bëj gjithherë dobi njeriut.

Mbi kurrizin tim ai bredh

ngaq bregu në breg.

Po çoç më hipën prej vetiu

një inat

apo një duf i sertë...

Çdo gjë e përlaj.

Vetes i ngja

BOSËT E FAJDEVE



Ata:

“Ne tërhoqëm sërë-sërë

Goxha.. një popull të tërë.

Pup, ç’nam do kishim lënë…!



Gjykatësi:

Me këdo që i hëngri “vrima”;

ju u shfaqët kryetrima.

Më ju lumçin bark e trap!

Dhe me më thellë,

në u ardhshin prapë!

GJAKMARRËSI



Gjykatësi:

“Ç’kërkoke, o zemërnxirë?

Dashke vdekjen me pahir?



Ai:

“Nuk lihet haku pa marrë.

Kështu thotë Kanuni i parë.



Gjykatësi:

“Ha ca vjet burgun së paku;

Ndryshe... do të t’mbyllet pragu....

PENGMARRËSI



Gjykatësi:

“A e di se çfarë të prêt?



Ai:

“Aman, një dënim të lehtë!

Se... kam gruan në kurbet.



Gjykatësi:

“Jo, more!

Kur t’jesh liruar,

të më marrësh peng

dhe mua?!

KRIMINELI



Brodhi nga brodhi krimineli,

Mendoi se diç i mungonte...

“Të mungon shpirti! – gojën çeli,

Dikush që tmerrin po “shijonte”...

LAJKATARI



I stis lajkat radhë-radhë

Nëpër rafte e sirtarë.

Të tjerat – hazër te xhepi..

Por... ç’e do... i mungon Shefi!

Oh, i gjori, sa ndien zor!

E kanë lënë

pa... Drejtor...

PROSTITUTA



Shpirt ke boll.. shumë të gjerë.

I “gostit” meshkujt të tërë.

Ke dhe trupin… sa të butë!

Ç’të mungon? Nuri a trutë?!



Nuk e dimë, pse po trete?!

Për të tjerët a për vete?

GAZETARËT



Një qëmton veç të këqiat.

Tjetri përcjell “bukuritë”…

Dikush merret me thërrmijat;

Siç ia servirin partitë…

Nga shtati duket të urtë.

Gati janë të nxisin “luftë”

TELEKRONISTI



Na jep kronikën e bardhë

E pas saj një sfond të pistë.

Ç’të gjykojmë ne më parëpër atë mishmash kronikë

FOLËSI TELEVIZIV



Buzëgaz e serioz flet

me etikë e pa koment.

Jo si ca kohët e fundit,

që ia mbytin kot – katundit...



Ndokush flet nga kok’ e tija;

sa gafil zihet Regjia…

FALSIFIKATORI



Sa monedha, pasaporta

porsi mjeshtër riprodhove.

Duart n’ “unazat e forta”

nëpërmend kurrë s’i shkove.

Pakëz të t’i zgjidhnin duart...

ç’do kishe falsifikuar?

Fletëlirimin sigurisht

Veç i lirë falson lirisht...!

SPIUNI



Tjetërsoj spiuni nxjerr krye;

strukur mes fircave të rendit.

Sinjalet ia dërgon shkëlqyer

mikut të vet – kriminelit.

SKAFISTI I NATËS



Nga vetvetja marrke “frymë”,

a mos nga tjetër “burim”?

Sidoqoftë, o Kryetrim,

Ti..jetë njerëzish ke ushqim…



Veç... ty dheu s’do t të tretë.

E ke emrin Antijetë.

PERSEKUTORI



Rastësisht ju u përballët

në të ngushtin ashensor.

Ule syt’ e tkurre ballët

para tij, Persekutor!

I PERSEKUTUARI



“Mikun” e njohe… sa shpejt!

Shtrëngove grushtat , “buzëqeshe”.

Me buzëqeshjen tënde shigjetë

persekutorin krejt e zhveshe..

VOTËLYPËSIT



Si të majtë dhe të djathtë

Na përkëdhelin pa masë.

Sa për votë na përkëdhelin.

Pastaj na lënë “çengelin”,

Ku të varim shpresat tona.

Ç’do na shohin syt’ akoma?..

NEUTRALI



Si i tretë u ndodhe në ashensor.

Ngjaje sikur vëzhgoje me zor.

Byreçkat përtypje me nge.

Nga gazrat shtrëngoheshe…he-he…!

Shumë s’e durove trysninë.

Mikromjedisit i dhe tjetër “klimë”…

KOPRRACI (Natyrë e qetë)



Një derë e pahapur kurrfarë.

Një kafe që kurrë s’është pirë.

Në një kamare”euro” dhe “dollartë”.

Ai në mes – si një kec i shtirë.

DY TË “POSRADASHURUAR”



Ajo: “Ja, pra, gushën ta fala.

I dashur, ti ç’më dhuron?

Ai: “Yjet të jap si gjerdan,

Diellin – si medalion...

Ai (me vete): “Të më bëhet xhepi tamam,

As trupi yt nuk mjafon...

DY KUNATA



Sec u pleksën, seç u grinë

Nga brenda gjer jashtë portës.

Burrat mendjeaguridhë

Mbetën “lolo” – gaz i botës…

DY VËLLEZËR



Njëri-tjetrin shumë e “donin”.

U grindën për një hendek.

Njëri me fjalë qëlloi, Kurse tjetri me… dyfek

DY MILITANTË



Njëri blu dhe tjetri rozë

Dy-tre fjalë hodhën në shesh...

Krisi sherri tym e blozë,

Sa turinjtë bënë përshesh.

Për shoqi-shoqin mllefi – bozë.

Mot e jetë – vath në vesh.